prep.ge

თორნიკე ერისთავი — კარი პირველი — თავი III — ორიგინალი ტექსტი

აკაკი წერეთელი · კარი პირველი — თავი III

ნაწილები
  1. კარი პირველი — თავი I
  2. კარი პირველი — თავი II
  3. კარი პირველი — თავი III
  4. კარი პირველი — თავი IV
  5. კარი პირველი — თავი V
  6. კარი პირველი — თავი VI
  7. კარი პირველი — თავი VII
  8. კარი მეორე — თავი I
  9. კარი მეორე — თავი II
  10. კარი მეორე — თავი III
  11. კარი მეორე — თავი IV
  12. კარი მესამე — თავი I
  13. კარი მესამე — თავი II
  14. კარი მესამე — თავი III
  15. კარი მესამე — თავი IV
  16. კარი მესამე — თავი V
  17. კარი მესამე — თავი VI
  18. კარი მეოთხე — თავი I
  19. კარი მეოთხე — თავი II
  20. კარი მეოთხე — თავი III
  21. კარი მეოთხე — თავი IV

III

ახოვანი, მშვენიერი,

თეთრწვერა და თეთრთმიანი,

წინ წამოდგა სასაუბროდ

მოწიწებით ტკბილხმიანი.

თაყვანი სცა პირველ მეფეს,

მერე კრებულს ორი მხრითა,

გულზე ჯვარად ხელებს იჭდობს,

თავდახრილი, ცრემლის ღვრითა.

წვერ-ულვაშზე მარგალიტებრ

ცრემლი ცრემლზე ეკიდება,

მწარის ოხვრით ვერ იქარვებს,

გულს რომ ცეცხლი ეკიდება...

უკვირს, რომ ამ სამსჯავროში

უმიზეზოდ ის ჩავარდა

და რომ მასზე გულს იყრიან

ისინი, ვინც მას უყვარდა.

გულნატკენად რომ უყურებს

სხვებს, თვითონაც გული სწყდება,

მაგრამ თავის პირადობა

აღარ ახსოვს, ავიწყდება.

და საერო ნება-სურვილს

მორჩილებით აძლევს პასუხს

და თანდათან მისი სიტყვა

შეუპოვრად სჭექავს და ჰქუხს:

„ვფიცავ იმ პირველ მიზეზსა,

ყოველ მიზეზის მიზეზსო,

ვიფიცავ საქართველოსა

და მერე, მეფევ, თქვენს მზესო,

რომ მართალი ვარ იმაში,

რაზედაც ბრალს მდებთ თქვენაო!

დაბლა ეს გული მიმოწმებს

და მაღლა - ღმერთი ზენაო!

მართალი არის, დღეიდან

რომ ვსტოვებ სამსახურსაო,

თუმც გული ჩემი ერთგული

ძველებურადვე ხურსაო.

თქვენ რომ გშორდებით, მით ვკარგავ

ხორციელ ნეტარებასო...

ვერ ხადავთ გულდაწყვეტილის

მოხუცის მდუღარებასო?

მაგრამ მივყვები საგანსა

აწ უფრო უდიდესსაო;

ის მარღვევინებს გაბედვით

ჩვენს ჩვეულებრივ წესსაო.

დრომ მოითხოვა აწ ჩემგან

სხვაგვარი სამსახურიო

და, რომ უარვჰყო, დავრჩები

ძველზედაც უმადურიო...

ეჰ, მეფევ! ბრალს რათ მადებდი

შენს ერთგულს, ფეხთა მტვერსაო,

რომ სამსჯავროში მაგდებდი,

ვით ორგულს... ქვეყნის მტერსაო?

იძულებით ვარ აწ მთქმელი

ყოველფრის უნაკლულოდო,

რაც გულმა გადამიწყვიტა

მხოლოდ მე საიდუმლოდო!

თქვენი ნებაა!.. მონა ვარ

მე თქვენის სურვილისაო!

სიტყვაა მხოლოდ წამალი

გულისთქმის, ურვილისაო!“

მოხუცმა ამ სიტყვების დროს

ცრემლები ჰღვარა მრავალი

და უნებურად დაიწყო

თვისი თავგადასავალი:

ტექსტის წყარო: აკაკი წერეთელი